Сауда және интеграция министрі Арман Шаққалиев Алматыдағы ірі сауда желілерін аралап, сауда субъектілерінің өкілдерімен кездесті, деп хабарлайды aqshamnews.kz
Кездесу барысында дүкен сөрелеріндегі отандық өнімдердің үлесін арттыру мәселесі талқыланды. Министр Алматыдағы сауда желілерінің жалпы ассортиментінің елеулі бөлігін отандық өнімдер құрайтынын атап өтті. Әлеуметтік маңызы бар тауарлардың ішінде, әсіресе сүт өнімдерінің үлесі жоғары екені айтылды.
Мысалы, Алматыдағы дүкендерде сүт өнімдерінің 97%-ы Қазақстанда өндірілген.
«Біз отандық фермерлермен және өндірушілермен тығыз жұмыс істейміз, олардың өнімдерін сауда желілеріне жеткізу үшін бар күшімізді салып жатырмыз. Ірі сауда желілеріндегі көкөністердің барлығы қазақстандық фермерлердің өнімі. Сонымен қатар, құс еті мен өсімдік майы сияқты басқа да әлеуметтік маңызы бар өнімдердің үлесін арттыру өте маңызды қадам болып табылады», – деді министр.
Отандық өндірушілерді қолдау мақсатында министр бірқатар бекітілген міндеттемелер туралы мәлімдеді. Атап айтқанда, барлық отандық өнімдерге арнайы «Қазақстанда жасалған» деген белгі қою міндеттелді.
Сонымен қатар, ішкі сауданы қолдау функциясының заңнамалық түрде Сауда министрлігіне берілуі отандық өндірушілер үшін үлкен мүмкіндік болып табылады. Бұл шара мемлекеттік қолдау алған сауда объектілеріне сөре кеңістігін 20%-ға арттыруды міндеттейді.
Енді дүкен сөрелерінің кемінде 50%-ы отандық азық-түлік өнімдерімен, ал кемінде 20%-ы тұрмыстық тауарлармен толтырылуы тиіс. Бұл тауарлар тұтынушылар үшін көрнекі әрі қолжетімді орындарда орналасуы қажет.
«Тұтынушыларды алдауға жол бермеу үшін біз тауарлардың сапасы мен орналасуына қойылатын талаптарды күшейттік. Мысалы, сүт өнімдері сүт сусындарымен, ал май – майдың балама түрлерімен қатар тұрмауы қажет», – деп атап өтті Арман Шаққалиев.