«Qazaq Air» әуе компаниясын сату туралы жаңа конкурс өтіп жатыр.
Бұл туралы «Самұрық-Қазына» АҚ даму және жекешелендіру жөніндегі басқарушы директоры Салтанат Сәтжан мәлім етті, деп хабарлайды аlmaty-akshamy.kz.
«Бізге „Qazaq Air әуе компаниясы сату туралы конкурс неге өтпей қалды? Неге қайтадан конкурс жарияланды?“ деген сұрақтар жиі түседі. Жаңадан жарияланған конкурстың қандай айырмашылығы бар? Біз былтыр тамызда „Qazaq Air“ әуе компаниясын сату туралы 2 кезеңнен тұратын ашық конкурс жарияладық. Дегенмен конкурс талаптарына сай келетін өтініш түскен жоқ», - деді Салтанат Сәтжан «Самұрық-Қазына» АҚ қоғамдық кеңес отырысында.
Оның айтуынша, халықаралық инвесторлар аталған әуе компаниясына қызығушылық танытқан.
«Содан кейін конкурстың жаңа талаптарын әзірледік. Конкурс қазір жүріп жатыр. Жаңа байқаудың артықшылығы - Qazaq Air әуе компаниясының қарызын өтеу мерзімі өзгерді. Бүгінде компанияның 38 млрд теңге қарызы бар. Қаржыны әуе компаниясы 5 ұшақ алу үшін ұлттық қордан алған», - дейді ол.
Сондай-ақ «Самұрық-Қазына» АҚ өкілі қарызды 2044 жылға дейін өтеу керектігін айтты.
Конкурс 29 қаңтарға дейін жалғасады, оған кез келген инвестор қатыса алады.