Радиоэлектроника және байланыс әскери-инженерлік институты күзет ротасының алты сарбазы еліміздің жоғары оқу орындарында тегін білім алу құқына ие болды. Олар жауынгерлік және мемлекеттік-құқықтық дайындықта жоғары нәтиже көрсетіп, грантта оқу мүмкіндігіне ие болды, деп хабарлайды aqshamnews.kz.
Олардың төртеуі осы аталған әскери институтқа, тағы біреуі Т.Я.Бигелдинов атындағы Әуе қорғанысы күштерінің әскери институтына түссе, тағы біреуі азаматтық жоғары оқу орнына қабылданатын болады. Гранттарды бөлу рәсімі Қорғаныс министрлігінің сайтындағы «Срочники 2.0» электронды платформасы арқылы онлайн режимде өтті.
– Әскери борышымды атқару өмірімдегі маңызды кезеңдердің бірі болды, мінезім шыңдалды, төзімділікке үйретті. Грант иегері атану – білім алуға мүмкіндік қана емес, әскери міндетімді атқару барысында жұмсаған күш-жігерімнің мойындалуы деп білемін, – деп өз қуанышымен бөлісті Халықаралық ақпараттық технологиялар университетіне түскен қатардағы жауынгер Нұрболат Ашуов.
Сондай ақ, Радиоэлектроника және байланыс әскери инженерлік институты сержанттар мен запастағы офицерлерді даярлау бағдарламалары бойынша ақылы оқыту үшін азаматтық жоғары оқу орындарының студенттерін қабылдауда. Бағдарлама бойынша әскери кафедрасы жоқ жоғары оқу орындарының студенттері оқи алады. Запастағы сержант атағын алғысы келетін студенттер үшін оқу мерзімі бір жыл, ал оның құны – 250 000 теңге. Запастағы офицер болуды жоспарлағандар 500 000 теңге төлеп екі жыл оқуы керек.