Василий Жиров Алматыда Ұлттық ұлан сарбаздарымен кездесті
Құқықтық тәртіп әскерінде сарбаздардың қоғам қайраткерлерімен, белгілі тұлғалармен, атақты спротшылармен кездесуі дәстүрге айналған. Алматыдағы «Оңтүстік» өңірлік қолбасшылығындағы ұландық жауынгерлер бұл жолы тәуелсіз Қазақстанның алғашқы олимпиада чемпиондарының бірі – Балқаш барысы Василий Жировпен жүздесті.
1996 жылғы Атланта олимпиадасының чемпионымен кездесу 5571 әскери бөлімінде өтті. Оған 300-ден аса сарбаз қатысты.
Балқаш жолбарысы биік белестерді бағындыру жолында талай кедергілер мен қиындықтарға тап болғанын, тек ерен еңбектің арқасында бәрін еңсере білгенін әсерлі әңгімеледі. Биік армандарға жету жолдарымен бөлісіп, салауатты өмір салтын ұстануға да шақырды. Сарбаздар тарапынан қойылған сауалдар да жауапсыз қалмады. Олимпиада чемпионы ұландық сарбаздарға өзінің қолтаңбасы қойылған боксерлік қолғабы мен фотосуреттерін естелікке тарту етті.
– Жировтың әңгімесін зейін қойып тыңдаған сарбаздар ерекше рухтанып, бұл кездесуден үлкен әсер алғанына сенімдімін. Василий Жиров – халқымыздың мақтанышы, өзінің еңбегімен және табандылығымен әлемнің спорт аренасында Қазақстан туын желбіреткен спортшы. Вел Баркер кубогының иегерін шақырудағы мақсатымыз – сарбаздар арасында салауатты өмір салтын насихаттау. Болашақта шың басына шыққысы келетін сарбаздарға аға буын өкілдерінің осындай ақыл-кеңесі ешқашан артық етпейді. Керегін түртіп алып, қажетіне жаратады. Сондықтан біз бұл игі дәстүрді жалғастыра береміз, – дейді «Оңтүстік» өңірлік қолбасшылығы Тәрбие және әлеуметтік-құқықтық жұмыстар басқармасының бастығы подполковник Арман Сейітов.
Кездесу соңында чемпион сарбаздармен естелік фотоға түсті.