ҚР Қаржы министрлігі Мемлекеттік кірістер комитеті жалпыға бірдей белгіленген салық салу режимінде жұмыс істейтін кәсіпкерлер мен компанияларды әкімшілендіруді жалғастыруда. Бұл ретте салықтық міндеттемелерін дұрыс орындамай, өзара есеп айырысу арқылы кірістерін төмендететін салық төлеушілерге ерекше назар аударылып отыр. Бұл туралы Aqshamnews.kz сайты хабарлайды.
Жүргізілген талдау нәтижесінде 633 салық төлеушіге кірістерін төмендету белгілері бойынша хабарлама жіберілген. Олардың қатарында 172 құрылыс саласындағы компаниялар (оның ішінде ірі құрылыс компаниялары да бар), 102 сауда және басқа да қызмет түрлерімен айналысатын кәсіпорындар бар.
Бүгінгі таңда, 12 наурыздағы мәлімет бойынша, кәсіпкерлер қосымша есептілік нысандарын тапсырып, салықтарын толықтыруда. Қазірдің өзінде 17 млрд теңге салық төленді. Бұл тізімге BI Group және BAZIS сияқты ірі құрылыс компаниялары да кіріп отыр. Мемлекеттік кірістер комитеті деректерді салыстыру және тексеру жұмыстарын жалғастыруда.
Сонымен қатар, құрылыс саласында жұмыс істейтін бірқатар ірі компаниялар қаржылық ашықтықты қамтамасыз ету және көлеңкелі схемаларды жою мақсатында цифрлық шешімдерді әзірлеуге және қаржыландыруға бастамашылық жасауда.
ҚР ҚМ Мемлекеттік кірістер комитеті барлық салық төлеушілерді салық заңнамасының талаптарын қатаң сақтауға шақырады. Егер жіберілген хабарламалар бойынша тиісті шаралар қабылданбаса, салық органдары кешенді салықтық тексерулер жүргізу туралы бастама көтеретін болады.