«Fortune Partners» консалтингтік компаниясының директоры Дана Тоқмурзина Қазақстанда жоспарланып отырған салық реформасын уақытылы әрі қажетті бастама деп бағалайды.
Сарапшының айтуынша, мемлекет әлеуметтік бағыттағы ел ретінде қалғысы келсе, кіріс бөлігін дұрыс қалыптастыруы керек. Бұл ретте салықтық моральды енгізу және салық жүктемесінің әділ бөлінуі маңызды рөл атқарады.
«Салық жүктемесінің коэффициенті салық төлеушілерді ынталандыру құралына айналуы керек. Оның орнына, мемлекет салықтық тексерулерді шектеуі қажет. Салық төлеу – бұл біздің ортақ міндетіміз. Оны адал орындаған жағдайда, мемлекеттен реформалар мен әлеуметтік қолдауларды күтуге құқығымыз бар», – дейді Дана Тоқмурзина.
Сарапшы әділ салық жүйесі мен азаматтарды ынталандыру тетіктерін құру арқылы елдің экономикалық тұрақтылығын нығайтуға болатынын атап өтті.