Ата-аналар дауыс беріп жатқанда, балалар да назардан тыс қалмады, деп хабарлайды aqshamnews.kz тілшісі.
Алматының Наурызбай ауданында Құрылтай мүшелерін сайлау үлкен отбасылық іс-шараға ұласты. Шұғыла шағынауданындағы №683 сайлау учаскесінде тұрғындарға мазмұнды бағдарлама әзірленіп, азаматтық белсенділік спортпен, шығармашылықпен және ұлттық дәстүрмен ұштасты.
Наурызбай – қарқынды дамып келе жатқан әрі халқы тығыз орналасқан аудандардың бірі. Мұнда жас отбасылар мен балалар көп. Сондықтан ұйымдастырушылар сайлау күнін отбасының әр мүшесіне қызықты әрі мазмұнды өткізуге мән берген.
Көпшіліктің ерекше қызығушылығын HaSSaQ этноспорттық бағыты бойынша садақ ату алаңы тудырды. Тұрғындар мергендік пен төзімділікті, зейін мен ептілікті қажет ететін дәстүрлі спорт түрінен күшін сынап көре алады.
Өнерге қызығатын тұрғындар үшін сәндік-қолданбалы өнер мен қыш бұйымдар көрмесі ұйымдастырылды. Мұнда шеберлердің туындысын тамашалап, халқымыздың мәдени мұрасын сақтап, кейінгі буынға жеткізіп келе жатқан дәстүрлі қолөнер түрлерімен танысуға мүмкіндік бар.
Ата-аналар дауыс беріп жатқанда, балалар да назардан тыс қалмады. Олар үшін арнайы аймақ ұйымдастырылып, түрлі-түсті аквагрим жасалды. Осылайша, көптеген отбасы үшін сайлау учаскесіне келу әркім өзіне қызықты іс таба алатын шағын мерекеге айналды.
Шұғыла шағынауданында сайлау маңызды азаматтық оқиға ғана емес, тұрғындардың басын қосқан спорттық, шығармашылық және отбасылық іс-шаралармен үндесіп жатыр. Мұнда тұрғындар сайлауға отбасымен келіп, көтеріңкі көңіл күймен таңдау жасауда.