ҚР Премьер-министрі Олжас Бектенов Қостанай облысына жұмыс сапары аясында Рудный қаласында болып, Соколов-Сарыбай тау-кен байыту өндірістік бірлестігінде (ССКӨБ) қара металлургияның дамуымен және Рудный ЖЭО-да жылыту маусымының барысымен танысты, деп хабарлайды aqshamnews.kz
Премьер-министрге ERG компаниясы мен ССКӨБ-тің ағымдағы көрсеткіштері мен даму жоспарлары баяндалды. ССКӨБ жылына 35 млн тонна кен, 9 млн тонна концентрат және 8 млн тонна түйіршік өндіреді. 2024 жылы Ресей мен Қытайға 371 млрд теңгеден астам сомаға 9 млн тонна өнім экспортталды.
ERG бас директоры Серік Шахажанов жылына 2 млн тонна ыстық брикеттелген темір (ЫБТ) өндіретін жаңа зауыт құрылысы туралы жобаны таныстырды. Инвестиция көлемі 500 млрд теңгені құрайтын бұл зауыт 1,1 мың жұмыс орнын ашуға мүмкіндік береді.
Олжас Бектенов ЫБТ зауытын салу индустрияны нығайтуға және мемлекеттің бәсекеге қабілеттілігін арттыруға ықпал ететінін атап өтті. Зауытты қажетті газбен қамтамасыз ету үшін Ақтөбе облысынан Қостанай қаласына дейін магистралды газ құбырын салу жобасы мақұлданған.
ССКӨБ құрамындағы Рудный ЖЭО-да негізгі және қосалқы жабдықтардың жөндеу жұмыстары аяқталып, қажетті отын мен материалдар қоры дайындалған. Қоршаған ортаға әсерді азайту үшін түтін құбырларындағы шығындыларды бақылаудың автоматтандырылған жүйесі енгізілуде.
Облыс әкімінің орынбасары Берік Танжарықов облыстағы жылыту маусымының штаттық режимде өтіп жатқанын және жабдықтарды жаңғырту арқасында жылу желілерінің тозуы 57%-дан 45,7%-ға дейін төмендегенін хабарлады.
Олжас Бектенов өнеркәсіптік нысандардың үздіксіз жұмысын қамтамасыз ететін коммуналдық инфрақұрылымды уақтылы жаңғыртудың маңыздылығын атап өтті. Бұл аймақтағы тұрақты дамуға ықпал ететін негізгі фактор ретінде бағаланды.