Мәжіліс депутаты Ринат Зайыт ақпарат және қоғамдық даму вице-министрі Қанат Ысқақовке көркем шығармалардағы бейпіл сөздерге қатысты сұрақ жолады, - деп хабарлайды aqshamnews.kz тілшісі.
"Бір-ақ нәрсені білгім келеді. Көркем шығарма деген болады. Қазір сіздер қызды-қыздымен "ана-мынаны тоқтату керек" деп жатырсыздар. Келісемін, боқтық айтуға болмайды. Бірақ ертең "бір түнде 7-8 қызды алып қаштым" деп ән айтқан менің жасымдағы жігіттерді соттап жүрмейміз бе? "Егер мен шын сүйсем, асыл еркем, ертең кешке ждайын тұр, қашу оңай" деген халық әні бар. Мұндай сараптаманы кім жасайды. Құзіреті бар адамдар ма? Оларды біз танимыз ба? Екіншіден, көркем шығармаларды қалай қорғайсыздар? Ертең фольклорымыздан айырылып қалып жүрмейік", - деді ол.
"Ондай әндерді айту үшін Иман Жүсіп болуымыз керек" деп әзілдеді Мәжіліс төрағасы Ерлан Қошанов.
Ақпарат және қоғамдық даму вице-министрі Қанат Ысқақов сараптаманы кім жүргізетінін айтты.
"Ең алдымен, бізде Конституция бойынша цензураға тыйым салынған. Екіншіден, шығармашылық еркіндік заңға қайшы болмаса, біз қолдаймыз. Сондықтан сараптаманы құқық қорғау органдары өткізбейді, оны біздің шығармашылық топ қарайды. Көркем шығармаларға келсек, сюжет деген нәрсе бар. Оның бәрін қараймыз. Егер заңға қарсы нәрселер көрінсе, оны режиссерге айтып, түзету жұмыстары ғана жүргізіледі. Ал былай жауапқа тарту деген жоқ", - деді ол.
Еске салайық, бұған дейін енді ән мәтінінде зорлық-зомбылыққа немесе алып қашуға шақыратын сөздері бар туындының авторы тексерілетіні айтылған еді. Ішкі істер министрлігі ондай әндердің әрқайсына құқық тұрғысынан баға беруге дайын.