Папа Францисктің автокөліктерінің бірі балаларға арналған жылжымалы медициналық пункт етіп жасақталып, Газа секторына жіберіледі.
Бұл Рим Папасы дүниеден өтер алдында айтқан соңғы тілектерінің бірі болған. Ол 2014 жылы киелі жерлерге қажылық жасаған папамобильді католиктік Caritas Jerusalem қайырымдылық ұйымына Газа секторындағы ауыр гуманитарлық жағдайдың салдарын жоюға көмек көрсету үшін беруге өсиет еткен, деп хабарлайды aqshamnews.kz.
"Бұл тек қозғалыс құралы ғана емес, әлемнің Газа секторындағы балалар туралы ұмытпағандығы туралы үндеу", - деп атап өтті Caritas Sweden-нің бас хатшысы Петер Брюн.
Жаңа жылжымалы клиникада дәрігерлер мен санитарлар қызмет етеді. Осылайша, ол Газаға бару қауіпсіз бола салысымен бірден жолға шығады.
Арнайы жүргізушісі мен дәрігерлер бар көліктің ішінде диагностикалық және емдік жабдықтар, соның ішінде инфекцияға экспресс-сынақтар, жараны тігуге арналған жабдықтар, инелер, оттегі баллондары, вакцина мен дәрі сақтауға арналған тоңазытқыш бар.
Папа Франциск бірнеше мәрте Ресей мен Украина, сондай-ақ Израиль мен ХАМАС арасындағы соғысты тоқтатуға шақырды. Соңғы рет ол өмірден өтерінен бір күн бұрын – Пасха жексенбісінде бейбітшілікке үндеген еді.