Бақылаушылар 11 ұйым мен 25 мемлекеттен келді. Байқаушыларды еліміздің сыртқы істер министрі мен орталық референдум комиссиясының төрағасы шақыртқан, деп хабарлайды almaty-akshamy.kz
Ата Заң – еліміздің мызғымас тірегі. Бірақ мемлекет пен халықтың беріктігі үшін Конституция баптарын заманға лайықтап отыру ләзім. Міне, араға 27 жыл салып, республикалық рефендум өткізіп жатырмыз. Ел аумағындағы 10 мыңнан астам учаскеде науқанның әділ әрі ашық өтуін халықаралық байқаушылар бақылайды.
Байқаушыларды тіркеу референдумға 5 күн қалғанда, яғни 30 мамырда аяқталды. Олардың арасында түркі мемлекеттері ұйымының өкілдері, ТМД парламентаралық ассамблеясының мүшелері бар. Соңғысы еліміздегі саяси науқанға 15-інші рет қатысып жатыр.
Жоба дайын. Референдумға халықтың 50 проценттен астамы қатысып, қолдау білдірсе, Конституцияның 3-тен бір бөлігі, яғни 33 бапқа 56 өзгерту енгізіледі. Демек тәжірибелі халықаралық байқаушыларға артылған жауапкершілік зор.
– ҚР Конституциясына өзгерістер мен толықтырулар енгізу жөніндегі республикалық референдумға 25 шет мемлекеттен және 11 халықаралық ұйымнан 272 байқаушы қатысатын болды. Халықаралық байқаушылардың қатысуы науқанның ашықтығы мен жариялылығына, мемлекет пен халықаралық міндеттемелерді сақтауына ықпал ететінін тағы да атап өткім келеді, - дейді Орталық референдум комиссиясының төрағасы Нұрлан Әбдіров