Қазақстан Сыртқы істер министрлігі Ресейде Ленинград облысындағы жаппай төбелеске қатысты пікір білдірді. Онда Қазақстан азаматтары да болған, , – деп хабарлайды aqshamnews.kz тілшісі.
СІМ-нің ресми өкілі Ерлан Жетібаевтың растауынша,26 наурызда Ленинград облысындағы Усть-Луга вахталық кентінде жанжал шыққан, оған Қазақстан азаматтары да қатысқан.
"Оқиғаның мән-жайын жан-жақты әрі объектив анықтау мақсатында Ресей Федерациясының құқық қорғау органдары тиісті процестік әрекеттерді жүзеге асырды. Жанжалға қатысқандар ұсталды", - делінген хабарламада.
Қазір тергеу шаралары жалғасып жатыр.
"Қолда бар ақпаратқа сәйкес, Қазақстан азаматтарының арасында ауыр жарақат алған немесе ауруханаға жатқызу қажет адамдар жоқ", - деп атап өтті Жетібаев.
Сондай-ақ, оқиға орнындағы жағдай тұрақты екені және құзырлы қызметтердің бақылауында тұрғаны айтылды.
Ведомство өкілдері Санкт-Петербургтегі Қазақстанның Бас консулдығы қызметкерлері Ресейдің құқық қорғау органдарымен тұрақты байланыста екенін қосты.
Бас консул Қазақстан азаматтарына консулдық-құқықтық көмек көрсету және оқиғаның барлық мән-жайын нақтылау үшін оқиға орнына барған.
Жағдай қалай болған?
Threads-тегі жазбаға сүйенсек, бұл оқиға Усть-Луга кентіндегі вахталық қалашық аумағында болған. Видеода жиналған адамдарға жоғары жылдамдықпен көлік басып кіргені көрінеді.
Желі қолданушыларының бірі "қақтығыс Қазақстан азаматтары мен жергілікті күзетшілер арасындағы келіспеушіліктен басталды" деген нұсқаны алға тартты.
Сондай-ақ, желіде тағы бір видео пайда болды. Болжам бойынша кадрда кәсіпорын күзеті адамдарды көлікке күштеп тиеп жатыр.
Threads-тегі видеодан кадр