Полиция танымал рэпер Qarakesek-ке қатысты есірткі сақтады деген күдікпен соталды тергеу жүргізіп жатыр, - деп хабарлайды Аqshamnews.kz тілшісі.
ІІМ мәліметінше, Омар Амантаев (Qarakesek) Ақтөбеде ұсталғаннан кейін, әкімшілік құқықбұзушылықтар жөніндегі мамандандырылған ауданаралық сот оны мас күйінде автокөлік жүргізді деп кінәлі деп таныды. Амантаевқа 15 тәулікке қамау жазасы тағайындалды. Сонымен қатар, ол 7 жыл мерзімге көлік жүргізу құқығынан айырылды.
"Есірткі құралдарын сақтау дерегі бойынша ҚР ҚК-нің 296-бабы 2-бөлігі – "Есірткі құралдарын, психотроптық заттарды өткізу мақсатында емес, заңсыз сақтау" бойынша соталды тергеу жүргізіліп жатыр", – деп хабарлады ІІМ.
Егер рэпер есірткіні заңсыз сақтады деп кінәлі деп танылса, оған 160 АЕК-ке дейін (2025 жылы – 629 120 теңге) айыппұл салынуы, не 160 сағатқа дейін қоғамдық жұмыстарға тартылуы, не 40 тәулікке дейін қайта қамауға алынуы мүмкін.
Бұған дейін рэпердің тек әкімшілік қамауға алынғаны хабарланған болатын. Ал есірткі сақтау бойынша қылмыстық іс жайлы полиция айтпаған еді.
Еске салайық, қыркүйектің басында Ақтөбе полициясы 31 жастағы рэп-орындаушыны есірткілік мас күйінде ұстаған болатын. Оның жанынан ұнтақ зат салынған зип-пакет табылды.
Ұсталған адамның Qarakesek екені анықталды. Бұл - Омар Амантаевтың сахналық есімі. Ол 1994 жылы 17 қазанда Оралlf дүниеге келген. Әнші алғашқы шығармаларын интернетке қарапайым камера арқылы түсіріп, желіге жариялаған. 18 жасында алғашқы екі альбомын шығарды. Qarakesek Қазақстандағы ең үздік лирикалық рэп-орындаушылардың бірі саналады. Оның бейнебаяндарын YouTube-та миллиондаған адам көреді.