Алматының реновация жөніндегі жаңа бағдарламасында кварталдық құрылыс қарастырылған. Бұл туралы қала әкімі Ерболат Досаев Алматыдағы ОКҚ брифингінде сөйлеген сөзінде айтты.
«Қала әкімдігі 2024 жылғы 29 қарашада мәслихатпен бекітілген 2030 жылға дейін тұрғын үйді реновациялаудың жаңа бағдарламасын әзірледі. Реновацияның жаңа бағдарламасының негізгі қағидаты кварталдық даму болып табылады. Бұл ретте, ескі тұрғын үй иелеріне «бөлме үшін бөлме» қағидаты бойынша айырбастау немесе нарықтық құны бойынша ақшалай өтемақы алу мүмкіндігі беріледі», - деді Ерболат Досаев.
Қала басшысы атап өткендей, бүгінде Алматыда 14 430 пәтерге арналған 1 366 ескі үй бар, онда 43 мыңнан астам адам тұрады. Реновация бағдарламасында оның 676-сы, яғни 2030 жылға дейін тозығы жеткен үйлердің жартысы модернизацияланады. Оның айтуынша, реновация бағдарламасы сейсмикалық қауіпсіздікті күшейтуді ескере отырып, тұрғын үй қорын жаңартуға мүмкіндік береді.
Бағдарламаға сәйкес ғимараттарды көшіру және бұзу барлық меншік иелерінің келісімімен ғана жүзеге асырылатынын атап өткен жөн. Ерекше қажеттіліктері бар азаматтар үшін бірінші қабаттарға немесе лифттермен, пандустармен және кедергісіз кірумен жабдықталған үйлерге көшу шарттары көзделген. Мегаполис тұрғындарының қауіпсіздігін қамтамасыз ететін тектоникалық ақауларда орналасқан қаңқалы - қамысты үйлер мен ғимараттарды бұзуға баса назар аударылады.
Бағдарлама аясында сарапшылар мен қоғамдық ұйымдардан бастап уәкілетті мемлекеттік ведомстволарға дейінгі барлық реновацияға қатысушылардың өзара іс – қимылын үйлестіретін Реновация офисі (жобалау тобы) құрылды.