Алматыдағы референдум учаскелері дауыс беру орындары ғана емес, шағын қалалық мерекенің алаңына айналды. Таңертеңнен бастап учаскелер маңында музыка ойнап, тұрғындар отбасыларымен және достарымен жиналды. Көктемгі күннің шуақты ауа райы көтеріңкі көңіл күй сыйлады, – деп хабарлайды aqshamnews.kz тілшісі.
Көптеген учаскенің жанында жастар ән айтып, би билеп, шағын импровизациялық өнер көрсетті. Бір жерде заманауи әуендер шырқалса, енді бір жерде ұлттық музыка орындалып, жастар мектеп аулалары мен алаңдарда би билеп, мерекелік атмосфера қалыптастырды.
Дәстүрлі ойындар да назардан тыс қалған жоқ. Жастар асық ойнап, айналасына көрермендерді жинады. Кейбір тұрғындар ойыншыларды қолдап, өздері де осы көне қазақ ойынында бағын сынап көрді.
Бірқатар референдум учаскесінің жанында қолөнершілер жәрмеңкелері ұйымдастырылды. Мұнда қолдан жасалған әшекейлер, тоқылған киімдер, сөмкелер, шопперлер және түрлі авторлық бұйымдар ұсынылды.
Қала тұрғындары жәрмеңке сөрелерін қызығушылықпен аралап, шеберлермен әңгімелесіп, кәдесыйлар сатып алды.
Жас дауыс берушілердің айтуынша, референдумға қатысу олар үшін тек азаматтық борыш қана емес, сонымен қатар бұл күнді достарымен және жақындарымен бірге өткізуге мүмкіндік.
Учаскелердегі атмосфера референдумның алматылық жастар үшін маңызды саяси оқиғамен қатар, музыка, дәстүр және достық қарым-қатынас тоғысқан ерекше қалалық мерекеге айналғанын көрсетті.