АЭС салуды қолдау жөніндегі штаб мүшелері «DAMU» индустриялық-логистикалық аймағында шағын және орта бизнес өкілдерімен кездесті, сондай-ақ, «GREEN Land ALATAU» жылыжайына барды.
Кездесулер барысында атом электр стансасының ел экономикасына қосатын үлесі мен оның мультипликативті әсері туралы кеңінен әңгіме өрбіді. Әсіресе, АЭС құрылысы мыңдаған жаңа жұмыс орындарын ашуға, инфрақұрылымды дамытуға және отандық бизнестің өркендеуіне жаңа серпін беретіні айтылды.
«Атом электр стансасын салу – еліміздің болашағы үшін стратегиялық маңызы бар шешім. Бұл тек энергетикалық қауіпсіздігімізді қамтамасыз етіп қана қоймай, сонымен бірге, экономикалық өсім мен халықтың әл-ауқатын жақсартуға мүмкіндік береді. Әр азаматтың даусы аса маңызды, сондықтан біз бұл мәселеге байыпты қарауымыз керек. Референдум – халықтың пікірін тыңдап, оны іске асырудың тиімді жолы. Мен қазақстандықтар АЭС салу бастамасын қолдап, елдің дамуына өз үлестерін қосады деп сенемін», – деп Мәулен Әшімбаев қазақстандықтарды референдумға қатысып, белсенді дауыс беруге шақырды.
Сонымен қатар, кездесу барысында АЭС салу арқылы еліміздің энергетикалық тәуелсіздігі мен тұрақтылығына қалай қол жеткізуге болатыны, оның қоршаған ортаға әсері және ұзақ мерзімді тиімділігі де талқыланды. Штаб мүшелері атом энергетикасының Қазақстанды алдағы жылдардағы негізгі энергия көзіне айналдырып, экологиялық тұрақтылыққа жол ашатынын атап өтті.