Интернет кеңістігінде радикалды діни ағымдардың үгіт-насихаты күшейіп отыр. Бұл туралы теолог, Алматы қаласы Дін істері басқармасының жанындағы Кеңес беру және оңалту орталығының директоры Руслан Қайыргелді мәлімдеді.
Маманның айтуынша, экстремистік топтар әлеуметтік желілер мен түрлі онлайн платформаларда жабық қауымдастықтар құрып, әсіресе жастарды нысанаға алады. Бұған діни сауаттылықтың төмендігі мен әлеуметтік мәселелер әсер етеді.
«Бүгінде интернет – бақылауы қиын орта. Радикалды идеялар ашық әрі жасырын түрде таралады. Сондықтан сақ болу қажет», – дейді сарапшы.
Сонымен бірге ол Қазақстан Жаһандық терроризм индексінде 100-орында екенін атап өтті. Бұл елдегі террористік қауіптің төмен деңгейін көрсетеді. Дегенмен ақпараттық кеңістіктегі үгіт-насихат бәсеңдеген жоқ.
Алдын алу үшін не істеу керек?
Сарапшының пікірінше, ең алдымен халықтың діни сауаттылығын арттыру қажет. Мектептер мен жоғары оқу орындарында дінтану бағытындағы ағартушылық жұмыстар күшейтілуі тиіс. Сонымен қатар отбасы институтын нығайту маңызды, өйткені ажырасу деңгейінің жоғары болуы да жастардың осалдығын арттырады.
Сондай-ақ интернеттегі мазмұнға тұрақты мониторинг жүргізіп, радикалды материалдарды бұғаттау қажет. Бұған қоса, сапалы балама контент — подкасттар, ақпараттық сайттар, теологтардың қатысуымен ашық диалог алаңдарын дамыту ұсынылады.
Манипуляция тәсілдері
Радикалды ағым өкілдері адамдарды тарту үшін эмоциялық қысым, қорқыныш пен кінә сезімін пайдаланады. Кейде «шындықтың жалғыз көзі» ретінде өздерін таныстырып, жылдам шешім немесе материалдық игілік уәде етеді. Кейбірі адамның жеке өмірін, қаржысын бақылауға дейін барады.
Маман азаматтарды күмәнді, жабық топтардан аулақ болуға, сыни ойлауды дамытуға шақырады. Діни сұрақтар туындаса, тек ресми әрі білікті теологтар мен имамдарға жүгінген дұрыс.
«Адам шынайы жауап іздесе, оны күмәнді желілерден емес, білімді мамандардан табуы керек», – дейді Руслан Қайыргелді.
Материал Алматы қаласы бойынша ТҚК аппаратының ақпараты негізінде дайындалды.