Қызылорда облысында "Қылмыссыз өңір - кемел келешек кепілі" жобасы жүзеге асырылып жатыр, - деп хабарлайды aqshamnews.kz тілшісі.
Жобаның мақсаты – елді мекендердегі қылмыс деңгейін төмендету және тұрғындардың жайлы өмір сүруіне жағдай жасау.
Бұл жоба аясында өңірдің 18 ауылы алкоголь өнімдерін сатудан бас тартты.
Бұдан бөлек, 107 кәсіпкермен меморандумға қол қойылды (мейрамханалар мен дүкендерде алкоголь сату уақыты шектелді), нәтижесімен соңғы 3 жылда 35 елді мекенде бірде-бір қылмыс тіркелмеген.
Қоғамда "Заң мен Тәртіп"идеологиясын ілгерілету мақсатында 7 қарашада облыс прокуроры Ризабек Ожаров алкогольден ерікті түрде бас тартқан Жаңақорған ауданының Өзгентауылының тұрғындарымен кездесіп, ауыл әкімдері мен учаскелік полиция инспекторларын марапаттады.
Облыс прокуроры ауыл тұрғындарының, оның ішінде ақсақалдардың бұл бастаманы жүзеге асырудағы зор үлесін атап өтті.
Жоба өз жалғасын табуда, мүлдем төзбеушілік қағидаттарын нығайту, сондай-ақ заң мен тәртіптің сақталуы ерекше бақылауда.