Қытайда атом энергетикасының дамуы 1990 жылдары басталып, бүгінгі күні елде 57 ядролық реактор жұмыс істейді. Алғашқы атом электр станциялары іске қосылғаннан бері елде бірде-бір апат тіркелмеген. Сарапшылар бұл көрсеткішті қауіпсіздік шараларының қатаң сақталуымен байланыстырады.
Қазіргі уақытта Қытайда үшінші буын реакторлары қолданыста. Олардың ішінде ең ірі станциялардың бірі – солтүстік-шығыста орналасқан Тяньвань АЭС-і. Станция 300 гектардан астам аумақты алып жатыр және теңіз жағалауында орналасқан. Оның аумағында толыққанды қалалық инфрақұрылым бар: жол белгілері, бағдаршамдар, асхана, дүкендер мен кафелер жұмыс істейді. АЭС маңында 146 мыңға жуық халқы бар ондаған елді мекен орналасқан.
АЭС салынғанға дейін аймақтағы тұрғындардың негізгі табыс көзі балық аулау болатын. Алайда станцияның іске қосылуымен көптеген адамдар тұрақты жұмысқа ие болды. Әсіресе, жас мамандар арасында жұмысқа орналасу мүмкіндігі артты. Тяньвань АЭС-і жергілікті халықтың тұрмысын жақсартып қана қоймай, инфрақұрылымның дамуына да серпін берді.
Люхы ауылында өскен Гуи Мяу АЭС құрылысына куә болған 6 жасар қыз еді, ал қазір ол оқуын аяқтап, станцияда жұмыс істеп жүр. Ол былай дейді: «Бүгінгі таңда балық аулаумен тек үлкен кісілер айналысады. Бұрын балық аулап күн көрген жастар қазір АЭС-те жұмыс істейді. Олар жақсы жалақы алады. Біздің ауыл АЭС-ке ең жақын орналасқан. Мен осы ауылда өстім, бұрын мұнда жарық та, жол да жоқ еді. Жаңбыр жауса, балшыққа батып, жүре алмайтынбыз. Көлік те аз болатын. Қазір көпір салынып, жағдайымыз жақсарды. Ең бастысы, жұмыссыздық азайды».
Тяньвань АЭС-інің дамуы аймақтағы халықтың өмір сапасын жақсартып, экономикалық дамуға да оң әсер етті.