Қытайда жасанды интеллект негізінде жұмыс істейтін Hangxing No 1 атты робот-полицей қызметке кірісті, - деп хабарлайды Аqshamnews.kz тілшісі.
Жаңа технологиялы "қызметкер" қолын көтеріп, жолдағы қозғалысты реттейді, жаяу жүргіншілерге өтуге рұқсат беріп, көлік жүргізушілерінің тәртібін бақылайды. Hangxing No 1 дулыға тақпай жүрген велосипед мінушілерге, рұқсат етілмеген жерден өткен жаяу жүргіншілерге, сондай-ақ белгіленбеген жерге көлік қойған жүргізушілерге сыпайы дыбыстық ескерту жасайды.
Бағдаршаммен бірдей жұмыс істейтін робот жол қозғалысы ережелерін бұлжытпай орындайды. Қазіргі уақытта ол қозғалысты басқару және қоғамдық тәртіпті қадағалау міндетін атқарып жүр. Алдағы кезеңде оның функцияларын кеңейтіп, жолаушыларға қызмет көрсетудің басқа да түрлерін үйрету жоспарда бар екен.
Ханчжоу қаласында осыған ұқсас жол қозғалысын реттейтін роботтар әзірленіп, болашақта толыққанды робот-полицейлер паркін құру мүмкіндігі қарастырылып жатыр.