Қытайда мемлекеттік қаржы компаниясының бұрынғы басшысы өлім жазасына кесілді, деп хабарлайды Аqshamnews.kz тілшісі ҚХР Орталық телеарнасына сілтеме жасап.
Тергеу дерегіне сәйкес, 2014–2018 жылдары Huarong International мемлекеттік қаржы компаниясының бұрынғы бас директоры Бай Тяньхуэй өзге тұлғаларға жобалар сатып алуға және корпоративтік қаржыландыру алуға көмектескен. Осы қызметінің "ақысы" ретінде ол жалпы сомасы 1,108 млрд юань (шамамен 156 млн доллар) болатын ақша мен өзге де материалдық құндылықтар алған.
2024 жылдың 28 мамырында Тяньцзинь қалалық соты Бай Тяньхуэиді парақорлық үшін кінәлі деп танып, оған өлім жазасын тағайындады.
2025 жылдың ақпан айында сотталушы апелляция түсірді. Алайда Тяньцзиньнің Жоғарғы халық соты үкімді күшінде қалдырды. Сот шешімінде алынған параның мөлшері "аса ірі", ал оның салдары "аса ауыр" деп атап көрсетілген. Материалдар міндетті тәртіппен Қытайдың Жоғарғы халық сотына жолданып, ол да өлім жазасын бекітті.
Ақырғы шешім шыққан соң Тяньцзиньнің Екінші аралық халық соты белгіленген үкімді заңға сәйкес орындады. Ақпарат бойынша, жазаны орындау алдында Бай Тяньхуэйге жақын туыстарымен кездесуге мүмкіндік берілген.