Қырғызстан мен Тәжікстан СІМ басшылары келіссөздер жүргізді.
Қырғызстан СІМ Тәжікстанның Сыртқы істер министрлігіне заңсыз және деструктивті әрекеттер туралы наразылық нотасын табыс етті, деп хабарлайды Almaty-akshamy.kz Inbusiness.kz сілтеме жасап.
«Қырғыз тарапы 16 қыркүйекте бұрын қол жеткізілген барлық уағдаластықтарға қарамастан, Тәжік тарапы қарулы күштерді, ауыр әскери техниканы пайдалана отырып, Қырғыз Республикасының Баткен облысының Баткен және Лейлек аудандарындағы қырғыз-тәжік мемлекеттік шекарасының бүкіл периметрі бойынша шекаралық және азаматтық объектілерге опасыздықпен шабуыл жасағанын атап өтті», - делінген Қырғызстан СІМ хабарламасында.
Қырғызстан тарапы қол жеткізілген барлық уағдаластықтарды мүлтіксіз сақтауды, атысты тоқтатуды және әскери құралымдарды алып кетуді талап етті. Шекара маңындағы аумақтардағы жағдайдың ушығуына әкеп соқтыруы мүмкін жағдай туғызбай, шекарада туындайтын барлық проблемалар тек саяси-дипломатиялық құралдармен шешілуі тиіс екенін тағы да ерекше атап өтті.