Мемлекет Басшысы Қасым-Жомарт Тоқаев «Әділетті Қазақстанның экономикалық бағдары» атты Қазақстан халқына Жолдауында медиа, кино, музыка, дизайн, білім беру, ақпараттық технологиялар сияқты креативті индустрия салаларын дамыту мәселесін ерекше атап өтті. Сондай-ақ, бұл сектор әлі де дамымағанын және елімізде креативті экономиканың қарқынды өсуі үшін жағдай жасау қажет екені айтылды.
Ұлттық киноны қолдау мемлекеттік орталығының басқарма төрағасы Құрманбек Жұмағалидің айтуынша, бұл – киноиндустриядағы мамандарға да қатысты айтылған месседж.
«Президент «креатившілерге» жобаларды коммерцияландыру мәселелері бойынша көмектесу керек екенін айтты. Расында, біз қазір жақсы жобалардың да назардан тыс қалып, табыстарға жете алмай жатқанын көріп отырмыз. Егер кино саласына келетін болсақ, онда дайын фильмдер міндетті түрде табыс әкелуі тиіс. Бірақ, өкінішке орай, кейбір шығармашылық топ өкілдері түсірілім аяқталғаннан кейін фильмдерді қалай жарнамалап, жарыққа шығару керектігін білмейді. Ал кейбір режиссерлер өз фильмдерін халықаралық кинофестивальдерге ұсына ма, әлде кең прокатқа шығара ма – ол жағын алдын ала ойластырмайды. Сондықтан биылғы питчингті өткізгеннен кейін, біз кинематографистерге қандай тетіктер арқылы жергілікті деңгейде, тіпті қалай халықаралық нарыққа шығуға болатынын түсіндіру мақсатында тренингтер ұйымдастыруды жоспарлап отырмыз», – деді Құрманбек Жұмағали.
Сондай-ақ, ол биыл тамыз айында Ұлттық киноны қолдау мемлекеттік орталығы кинотеатр өкілдерімен, кинодистрибьюторлармен және кинопродюсерлермен кездесулер өткізгенін атап өтті.
«Қазір кино саласында барлығымызға бірыңғай даму стратегиясы қажет. Жалпыға түсінікті жүйе керек. Қазір біз қолданыстағы ережелер мен нормативтік-құқықтық актілерді жетілдіру мақсатында сала өкілдерімен белсенді кездесулер өткізіп жатырмыз. Сондай-ақ, ұлттық фильмдерге қолдау көрсету үшін жыл соңына дейін кинотеатрлармен меморандумдарға қол қоюды жоспарлап отырмыз. Жалпы, бизнес өкілдері отандық киноның дамуы жолында барынша қолдау көрсетуге және бізбен тығыз байланыста болуға дайын. Менің ойымша, қазір «креатившілер» Президенттің ерекше қолдауын сезінуде», – деді Құрманбек Жұмағали.