ҚР Спортты дамыту дирекциясы оқиғаға түсініктеме берді
Бүгін, 27 тамызда Ақордада Париждегі жазғы Олимпиада жүлдегерлерін салтанатты марапаттау рәсімі өтті. Олимпиадашылар мен олардың жаттықтырушылары Қазақстан президенті Қасым-Жомарт Тоқаевтың қолынан мемлекеттік марапаттар алды. Алайда, іс-шараның салтанаттылығына қарамастан, күміс жүлдегері, гимнаст Нариман Құрбановтың бұл жиынға қатыспағаны көпшіліктің назарын аударды. Taspanews.kz тілшісі мемлекет басшысы Қазақстан үшін тарихи медаль алып келген спортшының неге марапаттаудан шет қалғанын анықтауға тырысты.
ҚР Спортты дамыту дирекциясының баспасөз қызметінің өкілі Шамкен Байырбектің айтуынша, Нариман Құрбанов белгілі бір себептермен Президенттің марапаттау рәсіміне қатыса алмаған. Ол спортшының өзіне тиесілі барлық марапаттарды алатынын айтты.
«Нариман белгілі бір себептермен Президенттің марапаттауына қатысқан жоқ. Ол Президент пен мемлекеттен өзіне тиесілі барлық марапаттарын алады,» – деді Байырбек Taspanews.kz тілшісіне.
Оның айтуынша, Нариман Құрбанов қазіргі уақытта Алматыда. Марапаттау рәсіміне Нариманның әкесі әрі жеке жаттықтырушысы Хусанжан Құрбанов қатысты.
Кейінірек, Taspanews.kz редакциясына ҚР Спортты дамыту дирекциясының баспасөз қызметінің басшысы Аян Төлеген байланысқа шығып, спортшының «аздап ауырып қалғанын» мәлімдеді. Бірақ, тілшінің олимпиада жүлдегерінің президентпен кездесуіне қандай дерт әсер еткені туралы сұрағы жауапсыз қалды.
Еске салсақ, Қасым-Жомарт Тоқаев Олимпиадада жарқын жұлдыз болып жанғаны үшін Нариман Құрбанов пен оның әкесі және жаттықтырушысына – Хусанжан Құрбановқа «Парасат» орденін берген.
Taspanews.kz тілшісі күміс жүлдегер Нариман Құрбановпен және ҚР гимнастика Федерациясымен байланысуға тырысты, алайда спортшы да, федерацияның баспасөз хатшысы да қоңырауларға жауап бермеді.