Еңбек министрлігінің басшысы қазақстандықтардың сынына жауап берді.
Светлана Жақыпова Құрбан айт мерекесіне байланысты демалыс күнінің жойылуын түсіндірді, деп хабарлайды Almaty-akshamy.kz
Еңбек министрлігінің басшысы жыл сайын жыл соңында министрлік барлық мемлекеттік органдардан мереке күндері туралы ақпаратты сұрайтынын атап өтті. Сол кезде ҚМДБ Құрбан айттың бірінші күні 17 маусым болатынын жариялап, соған сәйкес күнтізбе құрастырылды.
"Сонымен бірге, ҚМДБ-ның хатында бұл күн күнтізбеге байланысты өзгеруі мүмкін екендігі туралы ескертпе бар еді, бізге Құрбан айттың басталуына екі апта қалғанда бірінші күн 16 маусым болатыны туралы ресми хат келді. Заңға сәйкес бұл күн демалыс күніне сәйкес келеді", - деді Еңбек және халықты әлеуметтік қорғау министрі Светлана Жақыпова.
2024 жылға бекітілген күнтізбе бойынша Құрбан айт 17 маусымға сәйкес келгендіктен, бұл күн демалыс күні болып жарияланды. Алайда 7 маусымда Қазақстан мұсылмандары діни басқармасы Құрбан айттың бірінші күні жексенбі, 16 маусымға сәйкес келетінін хабарлады.
Бұдан кейін Еңбек министрлігі демалыс күндеріне келетін діни мерекелерді кейінге қалдыруға болмайтынын, сондықтан 17 маусымдағы демалыс күні жойылды деп мәлімдеді.