Солтүстік Қазақстанға көшіру бағдарламасы бойынша 1 миллиардтан астам теңге ұрланған
Солтүстік Қазақстанға қоныс аудару бағдарламасының аясында мемлекеттен бөлінген қаражатты ұрлау деректері анықталды, деп хабарлайды aqshamnews.kz
Прокуратураның мәліметінше, бағдарламаға жалған тұлғалар қатысқан, яғни шынайы қоныс аударушылардың орнына ешқашан солтүстікке көшпеген адамдардың аты-жөні тіркелген. Сонымен қатар, құжаттар көбінесе тұруға жарамсыз немесе апатты жағдайдағы ғимараттарға рәсімделген, ал бұл ғимараттар төмен бағамен сатып алынған.
Ең сорақысы, кейбір азаматтар өздерінің құжаттары бойынша ресми түрде солтүстік өңірлерге көшірілгендерін білмеген. Бұл заңсыз әрекеттер Шығыс Қазақстан, Қарағанды, Ақмола, Қостанай облыстарында, сондай-ақ Абай және Ұлытау өңірлерінде анықталды. Прокуратура осыған байланысты 20-дан астам қылмыстық іс қозғап, тергеу амалдарын бастап кетті.
Бұл жағдай қоныс аудару бағдарламасының негізгі мақсатына үлкен соққы болып отыр. Бағдарламаның басты мақсаты – жұмыс күші жетіспейтін солтүстік өңірлерге халықты ынталандыру арқылы экономикалық және әлеуметтік дамуды қамтамасыз ету еді. Алайда, сыбайлас жемқорлық деректері бұл бастаманың беделін түсіріп, мемлекет қаражатының тиімсіз пайдаланылуына алып келді.