Қонаев қаласында жергілікті ауқымдағы төтенше жағдай жарияланды, деп хабарлайды aqshamnews.kz
Қонаев қаласында 12 желтоқсанға қараған түні секундына 25 метрден асқан қатты желдің салдарынан бірқатар тұрғын үйлер мен ғимараттардың шатырлары зақымдалып, көшелік жарықтандыру тіректерінің жұмысы бұзылды.
Қазақстан Республикасының «Азаматтық қорғау туралы» және «Жергілікті мемлекеттік басқару және өзін-өзі басқару туралы» заңдарының талаптарына сәйкес, қала әкімі табиғи сипаттағы жергілікті ауқымдағы төтенше жағдай режимін енгізу туралы шешім қабылдады.
17 желтоқсаннан бастап Қонаев қаласында төтенше жағдай режимі ресми түрде күшіне енді.
Зақымданған нысандарда жөндеу-қалпына келтіру жұмыстарын жүргізу үшін төтенше резерв қаражатын пайдалану жоспарланып отыр.
11 желтоқсаннан бері қаланың коммуналдық қызметтері күшейтілген режимде жұмыс істеп келеді. Қазіргі уақытта Қонаевтағы жағдай тұрақты: электрмен жабдықтау, су және жылумен қамту жүйелері штаттық режимде жұмыс істеп тұр.