Әлеуметтік қызметтер үйінде Алматы қаласы Қоғамдық кеңесі төралқасының кеңейтілген отырысы өтті.
Отырыс барысында Алматы қаласы Қоғамдық кеңесінің төрайымы Алтынай Көбеева АЭС салуы мәселесіне байланысты референдум өткізудің қажеттілігін сұрап, осы тақырыпты ортаға салды. Алғашқы болып ойын білдіргендердің бірі – Алматы қаласы Қоғамдық кеңесінің мүшесі, Алматы Азаматтық Альянсының төрағасы Қайыржан Әбдіхалықов болды.
- Мемлекет басшысы өзінің Қазақстан халқына Жолдауында 6 қазан күні болатын референдум туралы жария етті. Әрине, бұл өте маңызды шара. Өйткені референдум арқылы біз халық үніне құлақ асып, азаматтардың АЭС салу мәселесін қаншалықты қолдайтынын көреміз. Басқа мемлекеттерде жеке тұлға не үкімет қана осындай шешімдерді қабылдайды. Ал біздің елде жыл бойы 20 өңірде жария талқылаулар өтті. Яғни, бізде үкімет өз бетінше ғана емес, халықпен бірге осы шешім қабылдайды, – деді ол.
Референдум өткізуге байланысты Алматы қаласы Қоғамдық кеңесінің мүшесі, экономист Әкімжан Арупов та пікір білдірді.
- Президент және үкімет Қазақстан халқының пікірін білу үшін соңғы 3 жылда 2 рет референдум өткізілгелі жатыр. Президент өз сөзінде Әділетті Қазақстан құрудың басында екенімізді атап өтті. Кей адамдар «Әділетті Қазақстан» қайда дейді? Осындай саяси қадамдар әділетті қоғамның іргетасын қалап жатыр. Мен экономист ретінде Қазақстан экономикасының өркендегенін қолдаймын. Әлемде 400 астам АЭС бар және атом реакторы біздің еліміз үшін де жаңалық емес. 1970 жылдардан бастап Ақтау қаласында атом реакторы қолданылды, – деді Әкімжан Арупов.