Қаржы мониторингі агенттігі жалған стоматологиялық клиникалардың иелерін іздестіріп жатыр, - деп хабарлайды Аqshamnews.kz тілшісі.
Агенттік мәліметінше, мына адамдар іздестіріліп жатыр:
- Дүйсенов Аслан Қамбарұлы, 01.04.1992 ж.т.
- Иманбаев Габбас, 18.05.1998 ж.т.
- Елешев Есімхан Баяндиевич, 11.09.1987 ж.т.
Олар 46 млрд теңгеден аса қаражатты БЖЗҚ-дан заңсыз шығару мақсатында қылмыстық схемалар ұйымдастырды деген күдікке ілінген. Бұл мақсатта олар тіс емдеу қызметі көрсетілгендей жалған медициналық құжаттар рәсімдеген. Олар Маңғыстау және Атырау облыстарындағы 7 стоматологиялық клиниканы пайдаланған. Бұл мекемелер іс жүзінде ешқандай медициналық қызмет көрсетпеген.
Оларға қатысты бұлтартпау шарасы ретінде қамауға алу қолданылған.
"Айыпталушылардың бірі, яғни Дүйсенов А.Қ. бұрын полиция қызметкері болған, алайда теріс себептер бойынша жұмыстан шығарылған. 2016 жылы ол Қылмыстық кодекстің 105-бабы ("Өз-өзіне қол жұмсауға дейін жеткізу") және 362-бабы ("Қызметтік өкілеттіктерін асыра пайдалану") бойынша ауыр қылмыс жасағаны үшін 5 жылға бас бостандығынан айырылған", - деді ҚМА өкілі.
Қаржы мониторингі агенттігі қандай да бір ақпарат білетіндерден мына нөмір бойынша хабарлауды сұрады: +7 (7172) 70 84 78 - кезекші бөлім.