Алматыда Қазақ ұлттық қыздар педагогикалық университетінің (ҚазҰПУ) студенттері үшін заманауи жаңа жатақхана пайдалануға берілді. 120 орындық бұл нысан жеке инвестициялар есебінен салынған. Бұл туралы Aqshamnews.kz сайты хабарлайды.
Жаңа ғимаратта тек жатын бөлмелер ғана емес, душ бөлмелері, прачечная, оқу кабинеттері, асхана сынды студенттерге қажет барлық жағдайлар қарастырылған. Мұндай инфрақұрылым жастардың оқуына, демалуына және дамуына толық мүмкіндік береді.
Студенттік жатақханалар құрылысын үйлестіру жобалық кеңсесінің жетекшісі Дамир Кутумовтың айтуынша, кеңсе 2023 жылдан бері жұмыс істеп келеді. Сол уақыттан бері Алматыда 30 нысан салынып, 8304 студентке жатақхана орындары қамтамасыз етілген.
"Бұл жобада да кәсіпкер арнайы мемлекеттік бағдарлама туралы естіп, бізге жүгінді. Біз құрылыстың барлық кезеңінде қолдау көрсетіп, нысан толық пайдалануға берілгенге дейін бірге жұмыс істедік. Жыл соңына дейін тағы 5000 орынға арналған жатақханалар тапсырылмақ", – деді Кутумов.
Сонымен қатар, алдағы уақытта әл-Фараби атындағы ҚазҰУ-ға арналған 12 мың орындық жатақхана салу жоспарланып отыр.
Алматы – еліміздегі ең ірі білім беру орталығы, мұнда жүздеген мың студент білім алады. Сондықтан қалалық әкімдік пен жеке инвесторлар арасындағы серіктестік негізінде жатақхана салу – болашақ мамандарды қолдаудың маңызды бөлігі.
Қала билігінің пікірінше, мұндай жобалар білім сапасын арттырумен қатар, студенттердің өмір сүру деңгейін де жақсартады.