«Қазгидромет» 20 наурыз, жұма күні Астана, Алматы және еліміздің өзге де бірқатар қаласында ауаның ластануына байланысты қолайсыз метеорологиялық жағдай күтілетінін мәлімдеді, деп хабарлайды Aqshamnews.kz тілшісі.
Синоптиктердің болжамынша, қолайсыз метеожағдай Қостанай, Павлодар, Қарағанды, Теміртау, Өскемен, Риддер, Ақтөбе, Алматы, Астана қалаларында, ал Атырауда түнгі уақытта байқалады. Мұндай жағдай әдетте желсіздік, әлсіз жел, тұман және ауа инверсиясы салдарынан зиянды заттардың ауада жиналып қалуына әсер етеді.
Сондай-ақ 20 наурызда Астанада құбылмалы бұлтты ауа райы күтіледі, жауын-шашын болмайды. Тұман мен көктайғақ болжанып отыр. Жел оңтүстік-батыстан секундына 3-8 метр жылдамдықпен соғады. Ауа температурасы түнде -8…-10, күндіз +3…+5 градус болады.