Бұл туралы Индустрия және инфрақұрылымдық даму министрлігі (ИИДМ) хабарлады.
Индустрия және инфрақұрылымдық даму министрлігі екі жол операторын біріктіру бойынша Үкімет қаулысының жобасын дайындады, деп хабарлайды Almaty-akshamy.kz.
Жобада «ҚазАвтоЖол» Ұлттық компаниясы «Казахавтодор» ЖШС-дағы мемлекеттік үлесті сатып алу жолымен ұлттық компанияны Бірыңғай автожол операторы ретінде қайта құру қарастырылған.
«Осылайша, қазіргі уақытта «ҚазАвтоЖол» және «Казахавтодор» бірыңғай жол компаниясына біріктірілді. Қолға алынған шаралар республикалық маңызы бар жолдарды тәулік бойы күтіп ұстауды қамтамасыз етуде жедел әрі нақты шешім қабылдауға үлкен септігін тигізбек», делінген хабарламада.
Еске сала кетейік, биыл шілдеде Мемлекет басшысы Қасым-Жомарт Тоқаев Үкіметтің кеңейтілген отырысында «ҚазАвтоЖол» мен «Казахавтодорды» біріктіріп, біртұтас автожол компаниясын құруды тапсырған болатын.