Шайбалы хоккейден "Барыс" - "Динамо" Мәскеу матчында Әлихан Әсетовке қатты риза болдым. Қонақтар сапындағы Сергей Байков деген қорғаушы тым дөрекі ойнады. Әуелі Дмитрий Гурков деген шабуылшымызды "күш-айла" қолданып, ауруханаға жөнелтті...
Матч соңында 20-ға да толмаған, өрімдей жас Дінмұхамед Қайыржанды оқыс келіп, соғып... мұрттай ұшырды. Сол кезде оған Әлихан тұра ұмтылды.
Иә, Әлихан! Ешкіммен төбелеспейтін. Мұзайдын жақтауында, қарсы команда ойыншысының бірі... өзін аңдып келіп, екпінмен соққанда, қапыда жарақат алып қалатын Әлихан! Төбелеске жоқ қой ол! Мүлде!
Сол Әлихан әлгі Байковты қапсыра құшақтап алып, төпелей жөнелді. Шыр айналдырып, ұрды да, біраз...
Гурковты соққанда, жүгірмеп еді, Қайыржан жәбір көргенде, көзін жұмып алып, атылды ғой. О, шіркін! Осы көзсіз батырлығына қалай ырза болмайсың!?
Кезінде, ҚХЛ-дағы алғашқы ойындарын өткізе бастағанда, Талғат Жайлауов та дәл осы Әлихан үшін тұра ұмтылып, оған тиіскен бір хоккейшінің жағасына жармасып еді... Беу, шіркін, шынымен де, дүние кезек болады екен-ау, ә?..
Бүгін "Динамо" Мәскеу клубы әлгі Байковтың маусым соңына дейін қатардан шығып қалғанын ресми түрде жариялады. Оның қатарға қосылуына кемі 12 апта керек екен. Ота жасату үшін Мәскеуге қайтарып алыпты (Әлиханның соққысы бата тимесе де, қата тиді ме, ол жағын анық білмедім)...
Десек те, енді бәрі біліп жүрсін! Кез келген қазақтың қолы - қатты. Тек Дамир Рысбаевтың ғана соққысы қуатты, жұдырығы жуан емес, "момын" деген Әлиханнның да соққысы пәрменді!