Қазақ халық ертегілерінің бейне нұсқасы шықты
Республикалық «Қоғамдық келісім» орталығы бүгіннен бастап YouTube желісіндегі Qogam Life каналына жаңа ертегі салып отырады, деп хабарлайды Almaty-akshamy.kz
Қазақ және еліміздегі 20-дан астам этностың халық ертегілерінің бейне нұсқасы шықты. Республикалық «Қоғамдық келісім» орталығы бүгіннен бастап YouTube желісіндегі Qogam Life каналына жаңа ертегі салып отырады. Балаларға арналған контент «Қазақстан халқы ертегілері» кітабы бойынша дайындалған. Бұл кітап жыл басында жарық көрген. Тиражы шектеулі болғандықтан, ертегілерді барынша қолжетімді әрі тиімді ету үшін оның бейне нұсқасы да жасалған.
"Бірінші кітап 4-7 жас, екіншісі 8-11 жас аралығындағы балаларға арналған. Екі томнан тұрады. Жас ерекшеліктері ескерілген. Сонымен қатар, әр ертегі көлемі де 3 минутқа дейін. Балалар тез қабылдау үшін жалықтырмайтын форматта шықты", - деді «Қоғамдық келісім» РММ директоры Ғалымжан Құсманғали.
"Ертегі оқып өскен баланың қиялы ұшқыр болады. Ертегі оқып өскен баланың жүрегінде мейірімділік ерте оянады. Академиялық тілмен емес, жатық тілмен аударып жатқан кезде екінші жұмыс жүріп жатты. Яғни бейне форматы жасалды", - деді жазушы Камал Әлпейісова.
Сондай-ақ бүгін «Khancast» жобасының тұсаукесері өтті. Бұл подкаст - Қазақ хандығы тарихындағы ақтаңдақтарды анықтау үшін аналитикалық және салыстырмалы зерттеу элементтерінен құралған сұхбат. Жаңа аудиоөнімді халықаралық платформадан тыңдауға болады.