«Еңбек жолы» республикалық байқауының өңірлік кезеңінде түрлі саладағы жас мамандар озық шықты. Олар еңбек өтілінің қысқалығына қарамастан кәсіби жетістіктерге қол жеткізген. Жеңімпаздар арасында авиация, энергетика, аграрлық сектор, білім беру және басқа да салалардың өкілдері бар.
Мәселен, Алматы облысынан кран жүргізушісі Дильфуза Бақытжанова, Жамбыл облысынан әуе қозғалысын басқару диспетчері Еркебұлан Тұрысжан, Жетісудан ветеринар дәрігер Бауыржан Машанбаев, Ақтөбеден бригадир Мұхтар Түлкібаев үздік шықты. Түркістан облысын педагогика ғылымдарының магистрі, гимназия мұғалімі Гүлайхан Ерманова таныстырды.
Сондай-ақ Алматыдан электромеханик Досымжан Ерланов, Шымкенттен эколог Баянсұлу Оразбай, Абай облысынан өндіріс шебері Айбар Айдарұлы, Қарағандыдан Жұлдызай Байдүйсен, Ақмоладан зертханашы Аяжан Жамкенова, Атыраудан еңбекті қорғау инженері Айбар Аманжолов, ШҚО-дан энергетик Әли Ақшағанов, Маңғыстаудан Дарын Аманқұлов және өзге өңірлерден жас мамандар ерекшеленді.
Барлығы 20 финалист қазіргі қазақстандық жұмысшы жастарының әлеуеті мен табысқа жету жолын көрсетіп отыр. Биыл байқауға еліміздің 17 облысы мен 3 қаласынан 505 үміткер қатысқан.
«Еңбек жолы» байқауы жыл сайын өткізіледі және үш номинация бойынша жеңімпаздар анықталады:
-
«Үздік еңбек әулеті»
-
«Жұмысшы жастардың үздік тәлімгері»
-
«Өндірістің үздік жас қызметкері»
Жеңімпаздарды марапаттау рәсімі желтоқсанда, Жұмысшы мамандықтар жылының жабылуына арналған салтанатты іс-шарада өтеді.