Satbayev University-дің қауымдастырылған профессоры Инеш Кенжина атом электр станциясының құрылысы Қазақстанға көптеген салаларда ұзақ мерзімді тұрақтылыққа қол жеткізуге мүмкіндік беретінін айтты, деп хабарлайды aqshamnews.kz
Сарапшының айтуынша, бастапқы кезеңде АЭС құрылысына елеулі инвестициялар қажет болғанымен, оның жұмыс шығындары көмір немесе табиғи газбен жұмыс істейтін жылу электр станцияларына қарағанда әлдеқайда төмен. Бұл, әсіресе, отын ауыстыру кезеңінің ұзақтығы (1,5 – 2 жыл) және АЭС-тің отын құнының электр энергиясын өндірудің өзіндік құнындағы үлесінің шамамен 10%-ды құрайтындығымен байланысты. Бұл факторлар тұтынушылар үшін энергия бағасының тұрақтылығын қамтамасыз етеді.
– Ұзақ мерзімді перспективада атом энергетикасы экономикалық тұрғыдан тиімді бола түседі, өйткені АЭС-тің қызмет ету мерзімі қазіргі таңда 60 жылды құрап, болашақта оны 80 және одан да көп жылға дейін ұзарту мүмкіндігі бар. Сонымен қатар, АЭС Қазақстанның энергетикалық жүйесін әлемдік энергетикалық нарықтағы өзгерістерге төзімді етеді, көмірсутектерге тәуелділікті азайтып, мұнай мен газдың әлемдік бағасындағы ауытқулардан елдің экономикасын қорғайды. Бұл Қазақстанға экономиканың тұрақтылығын арттырып, шығындарды алдын ала болжап отыруға мүмкіндік береді, – деп атап өтті Инеш Кенжина.
Оның пікірінше, АЭС сонымен қатар елдің экологиялық жағдайын жақсартуға, көміртегі шығарындыларын азайтуға ықпал етіп, жаһандық энергетикалық нарықтағы болашақ қиындықтарға дайындалуға көмектеседі. Атом энергетикасы Қазақстанға энергетикалық қауіпсіздікті нығайтуға және экономиканы сыртқы әсерлерден қорғауға мүмкіндік береді.