Қазақстанның таулы аймақтарында қар жамылғысының жиналуы жалғасып, кей жерлерде қар көшкінінің өздігінен жүру қаупі сақталып отыр, деп хабарлайды Aqshamnews.kz тілшісі.
Төтенше жағдайлар министрлігінің мәліметінше, тұрақсыз ауа райына байланысты елдің оңтүстігі, оңтүстік-шығысы және Шығыс Қазақстан облысының биік таулы аудандарында көшкін қаупі жоғары. Мамандар тік, қар басқан беткейлерге шығуға болмайтынын ескертеді.
Жыл басынан бері еліміздің таулы аймақтарында төрт өздігінен қар көшкіні тіркелген. Қауіпсіздікті қамтамасыз ету мақсатында Алматы қаласы мен Алматы және Шығыс Қазақстан облыстарында жалпы көлемі 4 200 текше метрден асатын 17 профилактикалық көшкін түсіру жұмысы жүргізілген.
ТЖМ өкілдері азаматтарды көшкін қаупі жарияланған кезде тауға бармауға, ауа райы болжамын алдын ала тексеруге және белгіленген соқпақтармен ғана жүруге шақырады. Қар мол түскен жағдайда тауға шығуды екі-үш күнге кейінге қалдыру ұсынылады.