2024 жыл Қазақстан үшін Орталық Азия мемлекеттерімен көпжоспарлы ынтымақтастықты нығайту тұрғысынан маңызды жыл болды. Мемлекет басшысының «Орталық Азияның Ренессансы: орнықты даму мен өркендеу жолында» бағдарламалық мақаласы өңірдегі бауырластық қатынастар мен стратегиялық серіктестіктің жаңа форматтарын белгіледі, деп хабарлайды aqshamnews.kz
Әзербайжан Президенті мен БҰҰ өкілдерінің қатысуымен Орталық Азия мемлекеттері басшыларының консультативтік кездесуі 6-шы рет өткізілді. Саммит қорытындысы бойынша «ОА-2040» Өңірлік кооперацияны дамыту тұжырымдамасына және 2025-2027 жылдарға арналған Өнеркәсіптік кооперацияны дамыту жөніндегі іс-қимыл жоспарына қол қойылды, бұл Орталық Азиядағы ынтымақтастықтың жаңа кезеңін бастады.
Қазақстан халықаралық дипломатияда маңызды рөл атқаруды жалғастыруда. Астана процесі аясында Сирия дағдарысы бойынша келіссөздер алаңы ұсынылып, еліміз қақтығыстарды реттеу үшін делдалдық қызметтер атқаруда. Сонымен қатар, Қазақстан өңірлік қақтығыстарды шешу мақсатында халықаралық медиация орталығын құруды ұсынды.
Қазақстанның энергетика, көлік, сауда және цифрлық технологиялар саласындағы ірі өңірлік жобаларға бастамашы болуы еліміздің жаһандық экономикалық байланыстарды нығайтуға деген ұмтылысын көрсетеді. Транскаспий халықаралық көлік бағытын дамыту және Еуразиялық экономикалық одаққа белсенді қатысу еліміздің сыртқы саясатындағы басты бағыттар болып табылады. Жасыл технологиялар мен экономиканы декарбонизациялау жөніндегі бағдарламалар Қазақстанның халықаралық күн тәртібінде маңызды рөл атқарып отыр.
Қазақстан бейбітшілікке бағытталған сыртқы саясат ұстанып, еуразиялық кеңістікте қауіпсіздік, орнықты даму мен өркендеуді қамтамасыз ету үшін елеулі үлес қосуда. БҰҰ, ДСҰ және басқа да халықаралық ұйымдардың жаһандық бастамаларына қатысу және жетекші державалармен стратегиялық серіктестікті дамыту Қазақстанның сыртқы саясатының негізгі басымдықтары болып табылады.