Премьер-Министр Олжас Бектеновтің төрағалығымен өткен Үкімет отырысында отандық тауар өндірушілерді қолдау шараларының жергілікті өндірісті ынталандырудағы рөлі талқыланды, деп хабарлайды aqshamnews.kz
Өнеркәсіп және құрылыс министрі Қанат Шарлапаевтың баяндамасына сәйкес, 2024 жылдың бірінші жартыжылдығында Қазақстанның өңдеу өнеркәсібі 5,1%-ға өсті. Өсім қара және түсті металлургия, химия, машина жасау салалары және жиһаз өндірісі сияқты салаларда байқалды.
Отандық өндірісті қолдаудың негізгі тетіктері ретінде бірқатар заңнамалық өзгерістер қабылданды. Атап айтқанда, мемлекеттік сатып алуда отандық тауарларға басымдық беру, оффтейк-келісімшарттар жасау тетігін пысықтау, мемлекеттік бюджет есебінен салынатын объектілерде қазақстандық өндірістің тауарларын пайдалану бойынша бақылау енгізу шаралары қабылданды. Сонымен қатар, жер қойнауын пайдаланушылардың сатып алуларында отандық тауарларды жеткізуге шарттар жасасу, табиғи монополиялар субъектілері үшін конкурстық өтінім бағасын төмендету арқылы отандық тауарларды басым сатып алу талаптары белгіленді.
Министр Шарлапаев бұл шаралардың нәтижесінде отандық өндірушілердің өндіріс көлемі айтарлықтай ұлғайғанын атап өтті. Мысалы, «Радуга» ЖШС қағаз өнімдерін мемлекеттік сатып алудың арқасында өндіріс жүктемесін 12%-дан 100%-ға дейін арттырды. Сондай-ақ, «Лакра» ЖШС және «Marschall» ЖШС мемлекеттік сатып алуларға қатысу есебінен өндіріс көлемін едәуір өсірді. 2024 жылдың сәуір айында іске қосылған «Metal Former» ЖШС зауыты «Жайлы мектеп» жобасының арқасында өндірістің толық жүктелуіне қол жеткізіп, 3,6 млрд теңгеге өнім өндірді.
Бұл шаралар отандық өндірісті дамытуға және оның бәсекеге қабілеттілігін арттыруға елеулі үлес қосуда.