Германияның Фюрт қаласында халықаралық іздеуде жүрген Мақсат Дүйсенов ұсталды, - деп хабарлайды Aqshamnews.kz
Бұл ақпаратты Қазақстан Республикасы Ішкі істер министрлігі растады.
Министрліктің мәліметінше, Дүйсеновті Германияның құқық қорғау органдары ҚР ІІМ Интерполдың Ұлттық орталық бюросының сұрауы негізінде қолға түсірген. Ол Интерпол желісі бойынша халықаралық ынтымақтастық аясында анықталып, кейіннен қамауға алынды.
«ҚР ІІМ Интерполдың Ұлттық орталық бюросының сұрауы бойынша, Германия Федеративтік Республикасының Фюрт қаласында халықаралық іздеуде жүрген азамат Д. ұсталды. Іздеудегі тұлға неміс құқық қорғау органдары тарапынан анықталып, қамауға алынды», – делінген ІІМ таратқан хабарламада.
Мақсат Дүйсенов 2018 жылдың тамызынан 2019 жылдың сәуіріне дейін Қазақстан Республикасының бас көлік прокуроры қызметін атқарған. Ол бұл қызметке сол кездегі Бас прокурор Қайрат Қожамжаровтың бұйрығымен тағайындалған болатын.
Айта кетейік, Қайрат Қожамжаровтың өзі қазіргі уақытта қызметтік өкілеттігін асыра пайдалану және қылмыстық кірістерді заңдастыру фактілері бойынша тергеліп жатыр.