Қазақстанның бірнеше өңірінде қар көшкіні қаупі сақталып отыр. ТЖМ мәліметінше, қолайсыз ауа райы мен қар қорының жиналуына байланысты таулы аймақтарда қардың өздігінен сырғу қаупі бар, – деп хабарлайды aqshamnews.kz тілшісі.
Қазақстанның бірқатар өңірінде қар көшкіні қаупі сақталып отыр. Бұл туралы Төтенше жағдайлар министрлігінің баспасөз қызметі хабарлады.
Ведомствоның мәліметінше, тұрақсыз ауа райы мен кей аумақтарда қар жамылғысының қалыңдауына байланысты қар көшкінінің өздігінен жүру қаупі бар.
Көшкін қаупі бар маусым басталғалы бері ел аумағында қардың өздігінен сырғуының 66 дерегі тіркелген. Жалпы қар массасының көлемі 175 мың текше метрден асқан.
Қауіпсіздік шаралары аясында 99 рет профилактикалық қар түсіру жұмысы жүргізілген.
Сондай-ақ министрлік көшкін жүруі мүмкін учаскелерге тұрақты бақылау жүргізіліп жатқанын мәлімдеді. Осы уақытқа дейін 378 жерүсті тексеруі өткізіліп, 110 ескерту белгісі орнатылған.
Қазіргі таңда ең күрделі жағдай Алматы қаласының маңындағы таулы аймақтарда, Алматы, Жамбыл, Шығыс Қазақстан облыстарында, Жетісу және Түркістан облыстарында сақталып отыр.
ТЖМ тұрғындарға көшкін қаупі туралы ескерту жарияланған кезде таулы аймақтарға барудан бас тартуға кеңес берді.