Қазақстан Республикасының Әзербайжан Республикасындағы Елшісі Әлім Байел бүгін Ақтау қаласы маңында орын алған ұшақ апатынан зардап шеккендердің тезірек сауығып кетуін тілектестік білдіріп, әлеуметтік желідегі парақшасына жазды, деп хабарлайды aqshamnews.kz
"Ақтаудағы ұшақ апаты туралы суыт хабарды терең күйзеліспен қабыл алдым. Қазақстан Республикасының Әзербайжан Республикасындағы Елшілігінің атынан қаза тапқандардың жақындарына көңіл айтамын. Жандары жәннәтта болсын! Зардап шеккендердің тез сауығып кетуін тілеймін!
Қазақстан Президенті Қасым-Жомарт Тоқаевтың тапсырмасымен ұшақ апатының себептерін анықтау және бірінші кезектегі көмекті көрсету үшін Үкіметтік комиссия жұмыс істеуде. Екі елдің құзыретті органдары бірге барлық қажетті шараларды атқаруда. Қазақстанның медициналық мекемелері тиісті жәрдемді көрсетуде. Ақтау қаласының көптеген жанашыр тұрғындары зардап шеккендер үшін қан тапсыруда. Қазақстандықтар Әзербайжанның Елшілігі мен Бас консулдығына гүл шоқтарын апаруда. Қазақстанның Бакудағы Елшілігінде ту төмен түсірілді.
Қазақстан мен Әзербайжан бұл сынақтан бауырластық пен өзара көмек рухында өтетініне сенімдімін. Біз біргеміз..."
Қазақстанның Әзербайжандағы Елшісі Әлім Байел