Биылғы жылдың алғашқы тоқсанында 4 мыңнан аса адам елде түпкілікті тұру үшін тіркелген.
Бұл өткен жылдың сәйкес кезеңімен салыстырғанда екі есе жоғары, деп хабарлайды Almaty-akshamy.kz
Ұлттық статистика бюросының дерегіне жүгінсек, иммигранттардың басым бөлігін көршілес өзбек елінің азаматтары құрап отыр. Екінші орында Ресейден келгендер тұр.
Сонымен қатар Қазақстанға Азияның өзге де елдерінен көшіп келушілер саны көбейген. Мәселен, жылдың алғашқы үш айында Түркіменстаннан келген мигранттар саны өткен жылға қарағанда 6, монғолиялықтар 4, Қытай мен Тәжікстаннан екі есе жоғары.
Сондай-ақ иммигранттар республиканың қай аймақтарында жиі шоғырланатыны белгілі болды. Мәселен, өзбек азаматтарының 50 пайыздан астамы Маңғыстау облысында, қалғаны еліміздің оңтүстік өңірлерінде тіркелген. Ресейден келгендер көбіне еліміздің басты екі мегаполисі - Алматы мен Нұр-Сұлтанды таңдайды екен.
Бір айта кетерлігі, жылдың алғашқы тоқсанында тіркелген шетел азаматтарының жартысынан астамы ұлтын қазақ деп көрсетсе, 15 пайыз иммигрант орыс, ал 7% қарақалпақ ұлтының өкілдері екенін айтқан. Сондай-ақ Қазақстанға қытай, парсы, чуваш және басқа да ұсақ этнос өкілдері қоныс аударған.