Алматыда Қазақстанда АЭС салу мәселесі бойынша жария талқылаулар басталды. Бұл талқылауларға атом саласының салалық сарапшылары, мемлекеттік органдардың өкілдері, жұртшылық пен азаматтық сектор өкілдері қатысуда. Бұл атом электр станциясының құрылысы перспективасын талқылайтын он тоғызыншы тыңдау, деп хабарлайды aqshamnews.kz
Іс-шараның модераторлары: қалалық қоғамдық кеңестің мүшесі Борис Жапаров, Қазақстан Азаматтық альянсының президенті Бану Нұрғазиева және Алматы Азаматтық альянсының төрағасы Қайыржан Әбдіхалықов.
«Мен өткен жылы Үлкен ауылында болғанымда, алғашқы жария талқылаулардың өтіп, жергілікті халықтың пікірін тыңдаған едім. Жергілікті тұрғындар көп жылдан бері өзгерістер мен АЭС құрылысын күтіп отыр. Атом энергетикасы туралы айтсақ, бұл қазіргі таңда ең дамыған мемлекеттер қолданатын жасыл технологиялар», ― деді Бану Нұрғазиева жария талқылауды аша отырып.
Жария талқылаулар барысында азаматтар өздерін қызықтыратын кез келген сұрақтарын, технологиялардың қауіпсіздігі мен АЭС құрылысының әлеуметтік-экономикалық аспектілері бойынша қоя алады.
2023 жылғы 1 қыркүйекте Қазақстан Республикасының Президенті Қасым-Жомарт Тоқаев «Әділ Қазақстанның экономикалық бағыты» атты Қазақстан халқына Жолдауын жариялады. Мемлекет басшысы өз Жолдауында атом энергетикасын дамытудың аса маңызды экономикалық және саяси аспект екенін атап өтті. Осы себепті ол бұл мәселені жалпыұлттық референдум арқылы шешуді ұсынды.
2024 жылдың маусым айының соңында президент Тоқаев атом электр станциясын салу бойынша референдум ағымдағы жылдың күзінде өтетінін мәлімдеді. Тарихи күнді Қазақстан Үкіметі анықтайтын болады.