Дін саласындағы мемлекттік саясатты қолдаушылар үлесі 87,6% құрап отыр.
Қазақстанда арнайы зерттеу жүргізіліп, мемлекет азаматтарының дін саясатына деген көзқарасы анықталған. Бұл зерттеудің нәтижесінде қазақстандықтардың 87% астамы осы елдегі дін саласындағы саясатты қолдайтынын анықталған. Бұл туралы астанада өткен баспасөз мәслихаты барысында ҚР АҚДМ Дін істері комитетінің төрағасы Ержан Нүкежанов айтты, деп хабарлайды Almaty-akshamy.kz.
Комитет пандемия кезінде интернет кеңістікте діни экстремизмнің алдын алу бойынша жұмыстарды күшейтуге ерекше назар аударып отыр. Ағымдағы жылдың бірінші жартыжылдығында ақпараттық кеңістікте 62 мыңнан астам материал әзірленіп, жарияланды. Бұл, өткен жылмен салыстырғанда, екі есе көп нәтиже.
Сонымен қатар, жергілікті атқарушы органдармен жүргізілген кешенді жұмыстардың нәтижесінде 84 мыңнан астам адам әлеуметтік желілердегі радикалды насихат көздерінен шығарылған.
««Жусан» гуманитарлық операциясы аясында террористік белсенді аймақтардан оралған әйелдердің 96%-ы радикалды көзқарастарынан бас тартып, қоғамға бейімделуі ведомствоның атқарған жүйелі жұмыстарының маңызды нәтижелерінің бірі болып отыр», – делінген Ақпарат және қоғамдық даму министрлігінің баспсөз қызметінің хабарламасында.
Сондай-ақ, Ержан Нүкежанов Діни қызмет саласындағы заңнаманы жетілдіру жөніндегі жұмыстарға тоқталды. Алдағы уақытта комитет тарапынан діни бірлестіктерді тіркеу және діни рәсімдерді өткізу мәселелерін оңтайландыруды көздейтін түзетулер енгізу жоспарлануда.
