Қазақстандық актриса Аружан Жазылбекова 39 жасында алғаш рет ана атанды, - деп хабарлайды Aqshamnews.kz тілшісі. Бұл туралы актриса әлеуметтік желіде бөлісті.
39 жастағы актриса қуанышты жаңалығын жұбайы Ержан Алдабергеновпен бірге Instagram парақшасында жариялады. Ерлі-зайыптылар Аружанның жүктілігінің соңғы кезеңінде түсірілген әсерлі видеоны бөлісіп, қызының дүниеге келген күнін де жария етті.
«Біз ұзақ уақыт сені қашан көретінімізді күтіп жүрдік. Сен әкеңнің ең бақытты санын таңдадың - 11.11.25. Осы күні біздің Саратайымыз дүниеге келді. Біз ең бақытты ата-анамыз», - деп жазды жұбайлар.
Желі қолданушылары мен әріптестері жас ата-аналарды құттықтап, жылы тілектерін жаудырды:
«Құтты болсын!», «Сәбиге мықты денсаулық», «Қуаныштарыңыз көп болсын» деген пікірлер видео астында сан мыңдап жиналып жатыр.
Аружан мен Ержанның қарым-қатынасы жайлы не белгілі?
Аружан мен Ержанның қарым-қатынасы бірнеше жыл бұрын жария болды. Олардың алғашқы ортақ суреттері 2021 жылы Instagram-да пайда болған. 2022 жылы Ержан Алдабергенов актрисаға Көлсай көлінің жағасында ұсыныс жасаған болатын.
Ержан Алдабергенов - "Барыс" хоккей клубының бұрынғы бас менеджері, қазіргі уақытта режиссер Канат Бейсекеев жүргізетін Zamandas подкастының авторларының бірі.
Актрисаның шығармашылық жолы
Аружан Жазылбекова - 1986 жылы Алматыда дүниеге келген. Балалық шағында спорттық бимен және ат спортынан сабақ алған. Кейін КИМЭП-те халықаралық журналистика мамандығын оқыған.
Оның мансабы модельдік индустриядан басталды: 2003 жылы Ford Models Super Model of the World байқауының іріктеу кезеңінде жеңіске жетіп, Нью-Йорктегі әлемдік финалда ТОП-10 қатарына енген. Кейін Парижде жұмыс істеді, Еуропа подиумдарында өнер көрсетті.
Кинодағы дебюті 2010 жылы Тоқтар Қарсақбаевтың «Махаббат тербелісі» фильміндегі басты рөлден басталған. Одан кейін «Асель, друзья и подруги», «Сердце мое, Астана», «Ограбление по-казахски», Канн фестивалінің Short Film Corner бағдарламасына енген «Вольные птицы» сынды жобаларда ойнады. Соңғы жылдары «Рэкетир-2», «Анаға апарар жол», «Үйге апарар жол» фильмдеріндегі рөлдерімен танылды.