40 млрд теңге субсидия іс жүзінде далаға кеткен.
Сыбайлас жемқорлыққа қарсы қызмет бүгінгі күні ауыл шаруашылығын дамытуға бөлінген субсидияларды жымқыру фактілері бойынша 109 сотқа дейінгі тергеуді ашты, деп хабарлайды Almaty-akshamy.kz Eldala.kz сілтеме жасап.
Мамандардың айтуынша, 73 адам күдікті деп танылды, оның 37 лауазымды және оларға теңестірілген адамдар болып табылады. Бұл туралы Сыбайлас жемқорлыққа қарсы іс-қимыл агенттігінің баспасөз қызметі хабарлап отыр.
Ведомствоның мәліметінше, аталған істер бойынша түрлі деңгейдегі 23 басшы өтіп жатыр. Олардың қатарында АШМ Мал шаруашылығы департаменті басшысының міндетін атқарушы, облыстық ауыл шаруашылығы басқармаларының төрт басшысы және олардың төрт орынбасары, аудандық ауыл шаруашылығы бөлімдерінің басшылары мен олардың орынбасарлары, облыстық аумақтық инспекция мен аудандық ветеринарлық қызмет өкілдері.
«Жалпы, агенттік субсидиялау саласын талдау кезінде қолданған тәсіл сыбайлас жемқорлық схемаларын анықтауда және жоюда өзінің тиімділігін көрсетті және аграршылардың өздерінің арасында оң пікірге ие болды. Бұл ретте агенттік Төрағасы субсидиялау саласындағы заңнамада АШМ мен облыс әкімдіктерінің басшылығын қоса алғанда, жоғары лауазымды шенеуніктердің жауапкершілігі бұлыңғыр екенін бірнеше рет атап өткен. Осыған байланысты олардың қылмыстарға қатыстылығын анықтау қиын. Сондықтан агенттік әзірленіп жатқан субсидиялау қағидаларында олардың жауапкершілігін дербестендіру бойынша ұсыныстар енгізді», - деп мәлімдеді Сыбайлас жемқорлыққа қарсы іс-қимыл агенттігінде.
Бұған дейін агенттік ауыл шаруашылығын субсидиялау саласын талдау барысында жемқорлардың қалтасына қаражат түсетін бірнеше тұрақты схеманы ашқан болатын. Мәселен, пара алған ветеринарлық бақылау комитеті қызметкерлерінің қатысуымен мал экспортқа мораторий кезеңінде шетелге экспортталған.
Сондай-ақ ҰАҒБО әкімшілендіретін АСЖ базасына дұрыс емес деректерді енгізу арқылы ауыл шаруашылығы жануарларының жасы мен жынысы түзетіліп, есептік деректер қайталанды. Нәтижесінде жоқ малға субсидия берілген немесе екі рет сол малға субсидия берілген.
Жайылымдарды суландыру үшін күн панельдерін жеткізуде тағы бір схема қолданылды. Жұмыс істемейтін жабдық жоғары бағамен сатып алынған, кейіннен ол пайдаланылмаған, ал 40 млрд теңге субсидия іс жүзінде далаға кеткен.