Оңтүстік Кореяның Чечхон қаласында өткен спорттық гимнастикадан Азия чемпионатында Нариман Құрбанов Қазақстан құрамасына алғашқы алтын медальді сыйлады, деп хабарлайды aqshamnews.kz тілшісі.
7 маусымда Құрбанов ат снарядындағы финалдық бәсекеде өнер көрсетіп, 14,933 ұпай жинап, бірінші орынға ие болды. Күміс жүлдені Оңтүстік Кореялық Хур Вун (14,633 ұпай), ал қола жүлдені Вьетнам спортшысы Данг Нгок Суан Тьен (14,233 ұпай) еншіледі. Сондай-ақ үздік бестікке қазақстандық Ілияс Азизов те (13,933 ұпай) енді.
Осы жеңісімен Құрбанов үш дүркін Азия чемпионы атанды. Бұған дейін ол 2022 жылы ат снарядынан күміс, ал 2023 және 2025 жылдары командалық көпсайыста екі қола медаль жеңіп алған болатын.
Қазіргі таңда Қазақстанның ерлер құрамасының қоржынында Азия чемпионатынан үш жүлде бар. Құрбановтың алтын және қола медальдерінен бөлек, Милад Карими едендегі жаттығудан күміс медаль еншілеген.
Айта кетейік, чемпионат 8 маусым, жексенбі күні мәресіне жетеді. Соңғы жарыс күнінде Милад Карими турник жаттығуынан жүлде үшін сынға түседі.
Еске салайық, 2024 жылы Париж Олимпиадасында Нариман Құрбанов күміс медаль жеңіп алған болатын. Бұл – Қазақстан тарихындағы спорттық гимнастикадан алғашқы Олимпиада жүлдесі.