Өнімнің алғашқы партиясы шағын зауытта шығарылды.
Қазақстанның ғалымдары спортшыларға арналған бірегей қоспаны шығарды, деп хабарлайды aqshamnews.kz Қазақстан ғылым және жоғары білім министрлігіне сілтеме жасап.
Жаңа тағамдық қоспа спортшыларға ғана емес, зиянды және ерекше зиянды еңбек жағдайында жұмыс істейтін адамдарға арналған.
Қоспаның басты ерекшелігі сол, ол жасушаларды зақымданудан қорғай отырып, тотығу стрессімен күресуге көмектеседі. Сондай-ақ, жасқа байланысты шығатын ауруларды бәсеңдетуге және қоршаған ортаның жағымсыз әсерлерімен күресуге, адамның физикалық және психикалық өнімділігін арттыруға ықпал етеді.
"Барлық өнім Қазақ тағамтану академиясында міндетті сараптамадан өтіп, арнайы диеталық өнім ретінде тіркелді. Жоба бойынша жұмыс әзірлеу, тестілеу және сертификаттау кезеңдерін қоса алғанда үш жылға жуық уақытты алды", - дейді жоба жетекшісі Серғазы Шыңғыс.
"Hormesis Oxy" жалпы атауымен үш өнім (кәсіби спортшыларға, ересек жастағы адамдарға және спортпен тұрақты емес айналысатындарға арналған) сериясы әзірленді. Болашақта халықаралық нарыққа шығу арқылы өндіріс пен өнім түрлерін кеңейту жоспарланып отыр.
"Өнімдерде полифенолдардың бірегей қоспасы – негізінен өсімдік тектес биологиялық белсенді қосылыстар, гель түзуші агенттер, сондай-ақ адаптагендер мен актопротекторлардың шөп сығындылары бар. Біз тәттілендіргіштер мен калориялық толтырғыштарды алмастыратын пребиотикалық және диеталық талшық болып табылатын полидекстрозаны қолданамыз. Сондықтан қант диабетімен ауыратын адамдар да пайдалана алады", - деп атап көрсетті ғалым.