Қазақстанның депозиттерге кепілдік беру қоры мен Маркетинг және социологиялық зерттеулер институты бірлесіп, әйелдердің қаржылық тәртібі туралы қызықты сауалнама жүргізді. Зерттеуге 18 бен 65 жас аралығындағы 1980 әйел қатысқан. Аqshamnews.kz хабарлауынша, зерттеу нәтижелері әйелдердің ақшаны сақтаудағы әдеттері мен мақсаттарын көрсетеді.
Зерттеу қорытындысына сүйенсек, әйелдердің 34%-ы жиған-тергенін банкте сақтайды екен. Бұл салымшылардың басым бөлігі – 81% теңгемен депозит ашуды таңдаған. Ал қалғандары шетел валютасын таңдайды.
Сауалнамаға қатысқан 30 жасқа дейінгі қыздардың 14 пайызы баспана алу үшін, 17 пайызы қаржылық қор жасау үшін және 5 пайызы бизнес ашу үшін ақша жинайтынын мәлімдеген.
Ал 30 жастан асқан әйелдердің 12 пайызы үй сатып алуды жоспарласа, 16 пайызы қаржылық қиындықтардың алдын алу мақсатында ақша жинайтынын көрсеткен.
Зерттеуге қатысқандардың 12 пайызы мүлде банкке ақша салмайды. Олар өз қаржысын бизнеске, жылжымайтын мүлікке, бағалы қағаздарға және бағалы металдарға инвестициялайды.
Зерттеуге қатысқандардың көбі отбасылы және жоғары білімі немесе ғылыми дәрежесі бар әйелдер екен. Олар көбінесе сауда, қызмет көрсету, бизнес және өндіріс, сондай-ақ өнеркәсіп саласында жұмыс істейді. Мамандар зерттеу нәтижелеріне қарап, қазақстандық әйелдердің қаржылық сауатының артып келе жатқанын атап өтуде.